Моллоор үйлчлүүлэх соёл гэж юу вэ?
Худалдааны томоохон төвүүд буюу “Молл” нь зөвхөн худалдан авалт хийх газар биш — орчин үеийн хотын амьдралын хэмнэл, амралт зугаалга, соёлын чиг хандлагыг тодорхойлогч нийтийн орон зай билээ.
Төвлөрөл ихтэй энэхүү орчинд өөртөө болон бусдад таатай уур амьсгал бүрдүүлэх нь хувь хүний соёлоос шууд хамаардаг. Вэб сайтын уншигч та бүхэндээ зориулан моллоор үйлчлүүлэгч соёлтой иргэний мөрдөх 5 алтан дүрмийг багцлан хүргэж байна.
Хувийн орон зай ба хөдөлгөөний соёл
Урсдаг шатаар зорчихдоо баруун гар талаа барьж зогсох нь яаруу нэгэндээ зам тавьж өгч буй соёлтой хэлбэр юм.
Мөн касс болон үйлчилгээний цэгүүдэд дугаарлахдаа бусдын хувийн орон зайг хүндэтгэн, дор хаяж 0.5 метрийн зай барих нь зүйтэй.
Бараа бүтээгдэхүүнд нямбай хандах
Хувцас, гоёл чимэглэлийг үзэж сонирхохдоо гэмтээхгүй байхад анхаарах хэрэгтэй.
Хувцас солих өрөөг цэвэрхэн үлдээх, таалагдаагүй барааг лангуун дээрх яг байсан газарт нь буцааж тавих нь дараагийн үйлчлүүлэгч болон үйлчилгээний ажилтнуудыг хүндэтгэж буй хамгийн том илэрхийлэл болно.
Хоолны талбар (Food Court)-ын дүрэм
Хоолны талбар бол хүн бүрийн дундын өмч юм.
Хоолоо идэж дууссаны дараа дараагийн үйлчлүүлэгчид суудал гаргаж өгөхийн тулд шууд босох, өөрийн идсэн аяга таваг, хог хаягдлыг зориулалтын цэгт хураах эсвэл хогийн саванд хаях нь соёлт иргэний наад захын үүрэг билээ.
Кино театр (CINEMA)-ын дүрэм
Кино театр бол хүмүүс нэг дор цуглаж, урлагийг мэдрэх дундын орон зай юм. Бусдын болон өөрийнхөө кино үзэх тав тухыг хангахын тулд:
- Кино эхлэхээс өмнө утсаа “Чимээгүй” (Silent) горимд шилжүүлэх
- Киноны үеэр суудал сэлгэж сэлүүцэхгүй байх
- Чанга ярих, утсаар ярих, үйл явдлыг урьдчилж чангаар тааж ярихгүй байх
- Хурц үнэртэй хоол унд идэхгүй, чипс зэрэг чанга дуугардаг хүнснээс татгалзах
- Попкорныг аяархан идэх
- Кино дууссаны дараа ундааны аяга, попкорны хайрцаг, хогоо суудлынхаа хажууд үлдээлгүй, зориулалтын хогийн саванд хаях
Эерэг харилцаа ба талархал
Үйлчилгээний ажилтнуудтай хүндэтгэлтэй харилцаж, “Баярлалаа”, “Үүнийг авъя” гэх мэт дулаан үгсийг хэлж хэвших нь тухайн орчны уур амьсгалыг эерэг болгодог.
Моллын соёл гэдэг нь…
Бусдад саад болохгүйгээр, өөртөө болон өрөөл бусдад таатай орчныг хамтдаа бүтээх тухай хотын соёлын салшгүй нэг хэсэг юм.
Манай UNITED MALL-аар тавтай тухтай үйлчлүүлнэ үү.
Баярлалаа!
